Պոլսոյ «Ս. Վարդանանց դպրաց դաս երգչախումբ»-ը Կիրակի, 5 Hոկտեմբեր 2014-ի առաւօտուն, այցելեց Անթիլիաս եւ կատարեց Ս. Գրիգոր Լուսաւորիչ Մայր տաճարի պատարագի երգեցողութիւնը` ղեկավարութեամբ Ատրուշան սրկ. Հալաճեանի:
Պատարագէն ետք, երգչախումբը ներկայ գտնուեցաւ Մեծի Տանն Կիլիկիոյ կաթողիկոսութեան դպրեվանքի 85-րդ ուսումնական-կրթական տարեշրջանի բացման հանդէսին:
Հանդիսութեան աւարտին, Արամ Ա. կաթողիկոս գնահատելով «Ս. Վարդանանց դպրաց դաս երգչախումբ»-ի ղեկավար Ատրուշան սրկ. Հալաճեանի երկար տարիներու ծառայութիւնն ու վաստակը հայ երաժշտութեան մարզին մէջ, զինք պարգեւատրեց Մեծի Տանն Կիլիկիոյ կաթողիկոսութեան «Ս. Մեսրոպ Մաշտոց»-ի շքանշանով:
Ապա, աւելի քան 50 հոգիներէ բաղկացած երգչախումբն ու վարչութեան անդամները, առաջնորդութեամբ երգչախումբի նախագահ Թաթուլ Ծ. վրդ. Անուշեանի, վեհափառ հայրապետին ճաշի հիւրերը եղան:
Related Post
