Համազգայինի Լիբանանի Շրջանային վարչութեան նախաձեռնութեամբ եւ Պէյրութի ամերիկեան համալսարանին հետ գործակցաբար, երէկ` կիրակի, 19 ապրիլ 2015-ին, երեկոյեան ժամը 6:00-ին, Պէյրութի ամերիկեան համալսարանի «Էսեմպլի հոլ»-ին մէջ տեղի ունեցաւ Համազգայինի «Կարկաչ» մանկական ու պատանեկան երգչախումբի համերգը` գեղարուեստական ղեկավարութեամբ եւ խմբավարութեամբ մայեսթրօ Զաքար Քէշիշեանի եւ դաշնակի ընկերակցութեամբ Արեգ Տաղլեանի` նուիրուած Հայոց ցեղասպանութեան 100-ամեակին:
Գեղարուեստական ղեկավար եւ խմբավար մայեսթրօ Զաքար Քէշիշեան սոյն իւրայատուկ առիթով ուղղեց իր սիրտին խօսքը: Քէշիշեան ներկաները ողջունելէ ետք, խնդրեց անոնցմէ մէկ վայրկեան յոտնկայս յարգել Հայոց ցեղասպանութեան նահատակներուն յիշատակը: «Այսօրուան մեր համերգը պիտի մատուցենք իբրեւ խունկ ու մոմ Հայոց ցեղասպանութեան ընթացքին զոհուած նահատակներուն յիշատակին», շեշտեց ան: Քէշիշեան փոխանցեց իր ուսուցման ընթացքին ունեցած զարմանքն ու զայրոյթը` նկատելով, որ տասնեակ մը լիբանանահայ վարժարաններու աշակերտներէ կազմուած յիսնեակ մը սաներէն մէկ քանին միայն ծանօթ էին կոմիտասեան երգերուն, սակայն ան նաեւ հաստատեց, որ իր ուրախութիւնը մեծ եղաւ երբ անցեալ չորեքշաբթի, աւելի քան 1700 աշակերտներ գիտակից ձեւով լսեցին կոմիտասեան անմահ ստեղծագործութիւնները:
Ապա մայեսթրոն բեմ հրաւիրեց Համազգայինին «Կարկաչ» պատանեկան երգչախումբը` ներկայացնելու համար Մեծ եղեռնի խորհրդանիշերէն` Կոմիտասէն, երգերու երկու շարքեր: Առաջին շարքը ընդգրկեց «Հով արէք սարեր ջան», «Հաբըրբան», «Ալագեազ սարն ամպել ա», «Խնկի ծառ» երգերը, իսկ երկրորդ շարքը` «Չինար ես», «Երկինքն ամպել ա», «Կուժն առա», «Գնա գնա» եւ «Շախկըր-շուխկըր»:
Համազգայինի «Կարկաչ» մանկական երգչախումբն ալ ներկայացուց «Արեւազօծ ծաղկանոց» երգաշարը. որ ըստ Քէշիշեանի աւանդական դարձած է Համազգայինի «Կարկաչ» մանկական ու պատանեկան երգչախումբին` Արեգ Լուսանեանի կողմէ մշակուած երգերը ներկայացնելը: Քէշիշեան ըսաւ, որ ««Արեւազօծ ծաղկանոց» խորագիրը կը պարունակէ տարուան 12 ամիսները, որոնցմով մենք եւս ծաղկեփունջ մը կը զետեղենք նահատակներուն անթառամ յիշատակին»:
Համազգայինին «Կարկաչ» պատանեկան երգչախումբը անգամ մը եւս բեմ բարձրացաւ` ներկայացնելու համար դասական, ժողովրդական, հայրենասիրական եւ այլ ժամանակակից երգեր` «Սաունտ Օֆ Միուզիք», «Նայիլի Ահլա Զահրա» եւ «Ռաժեհ-Ռաժեհ» երգերը:
Մայեսթրօ Զաքար Քէշիշեան շնորհակալութիւն յայտնեց Պէյրութի ամերիկեան համալսարանին` զիրենք քաջալերելուն եւ իրենց հետ գործակցելնուն համար, ապա Համազգայինի «Կարկաչ» մանկական ու պատանեկան երգչախումբը յայտագիրը փակեց «Ապրի՛լ կրկին» երգով:
Երգչախումբերուն ոգեշնչող եւ հոգեպարար կատարողութենէն ետք համերգը իր աւարտին հասաւ ներկաներուն բուռն ծափողջոյններով եւ ծաղկեփունջերու նուիրումով` խմբավարին եւ դաշնակահարին:
Related Post
