Երեքշաբթի, 20 յունուար 2015-ին, Համազգայինի «Լեւոն Շանթ» կեդրոնի «Գ. եւ Հ. Արմէնեան» սրահին մէջ տեղի ունեցաւ «Արեգ» թատերախումբի նոր ներկայացման առաջին փորձը:

Հայոց ցեղասպանութեան 100-ամեակին նուիրուած «Կարօտ» թատերախաղին հեղինակը, բեմադրիչն ու գեղարուեստական ղեկավարը Ռոպերթ Առաքելեանն է:

Թատերախաղի շուրջ երեսուն գրական կերպարները` գտնելով իրենց հարազատ դերակատարները, կը սկսին շունչ ու ոգի ստանալ, գրական արժէքէն վերածուելով տեսանելի արժէքներու:

Ներկայացման հերոսը` Կարօտը, այսօրուան եւ բոլոր ժամանակներուն հայն է, որ դեգերելով երկրէ երկիր, կը փորձէ գտնել երջանկութեան ու արդարութեան բանաձեւը, սակայն բազմազգ աշխարհի դժուարին խաչուղիներուն վրայ յաճախ հանդիպելով կաղ ու անտարբեր արդարութեան, կու գայ այն եզրակացութեան, որ «եթէ հզօր երկիր ունենանք, աշխարհը կը յարգէ մեր դատը եւ արդարութիւնը մեզի կը ներկայանայ ոչ թէ անկարող թշուառականի տեսքով, այլ` իբրեւ առողջ ու արժանապատիւ էութիւն…

Մարդ ուր որ ալ ըլլայ, հայրենի տուն պիտի ունենայ, կարօտի զգացում պիտի ունենայ, որպէսզի միտքը երթալու տեղ ունենայ: Երկիր պիտի ունենայ, հզօր երկիր ու հայրենի տուն…»:

Ռոպերթ Առաքելեանի «Կարօտ» թատերախաղը, որ «Արեգ»-ի այս թատերաշրջանի երկրորդ բեմադրութիւնն է «Ոսկի խնձոր»-էն ետք, 12 մարտ 2015-էն սկսեալ պիտի ներկայացուի հանրութեան` «Յակոբ Տէր Մելքոնեան» թատերասրահին մէջ:

Related Post