Հովանաւորութեամբ Սուրէն եւ Սոնիա Սարգիսեան ամոլին, անցնող շաբաթավերջին Համազգայինի Լիբանանի Շրջանային վարչութեան «Քնար» պարախումբը Ժտէյտէի «Սաժես» թատերասրահին մէջ հանրութեան ներկայացաւ «Կամուրջներ» պարային համոյթով, գեղարուեստական ղեկավար եւ պարուսոյց` Յովհաննէս Խաչիկեան, օգնական պարուսոյց` Կարիկ Խաչիկեան:

Ծրագիրը բաղկացած էր երկու մասէ: Առաջին բաժինով ներկայացուեցան ազգագրական պարեր, «Հայուհի», «Քոչարի», «Անուրջներ», «Ձկնորսներ», «Հայոց աղջիկներ», «Վրացական» պարերը: Այս բաժինին մէջ ելոյթ ունեցաւ նաեւ Համազգայինի «Գայեանէ» պարախումբը,  որ ներկայացուց հնդկական եւ գնչուական պարեր, իսկ «Գայեանէ»-ի պարուսոյցներ Կարէն եւ Ժաքլին Մակինեան ամոլը մեկնաբանեց «Գարուն» եւ «Թանկօ» պարերը:

Երկրորդ բաժինը նուիրուած էր Հայոց ցեղասպանութեան 100-ամեակին եւ կը կրէր «Կը յիշեմ եւ կը պահանջեմ» թեման: Պարոյր Սեւակի «Ղօղանջ եղեռնական» ասմունքին ընկերակցեցան  տեսարաններ գաղթէն, որմէ ետք պարախումբը ներկայացուց կենդանի պատկեր մը` ցեղասպանութիւնը մարմնաւորող, որ խորունկ ազդեցութիւն ձգեց հանդիսատեսին վրայ: Վերջին բաժինով ցուցադրուեցան  հայ հերոսներու, արուեստագէտներու եւ տաղանդաւոր անձնաւորութիւններու նկարներ «Կա՛նգ, պիտի լինե՛նք, ու դեռ շատանանք» կարգախօսով, որուն յաջորդեց եզրափակիչ պարը` «Սարդարապատ»-ը:

Արդարեւ, հաւատալով, որ մշակոյթը ազգի մը գոյատեւման գլխաւոր ազդակներէն մէկն է եւ մեր ինքնութիւնը անիմաստ է առանց մեր հարազատ մշակոյթին, «Քնար» պարախումբը այս ելոյթով յաջողեցաւ կամրջել ներկան անցեալին, ընթանալով դէպի ապագայ:

Յայտնենք, որ ելոյթները պիտի շարունակուին նաեւ այս շաբաթավերջին` ուրբաթ, 8, շաբաթ, 9 եւ կիրակի, 10 մայիսին, երեկոյեան ժամը 8:30-ին, նոյն վայրին մէջ:

Related Post